Merci Mini-Ziit
Also zerscht emol wetti Dankschön säge, allne wo ois Minis durs Joor dure begleite und mithälfe im Gottesdienst. Sone Ahzahl Ministrante imene Plan ihzteile und z’organisiere isch nid eifach. Au ig bi emol e chline Bueb gsi und ha mi nach dr Kommunion entschiede z’ministriere. I lueg gern uf die 6 Joor zrugg. I dere Ziit hani mit mine Mitministrante viel tolli Sache erläbt. I dene 6 Joor hani insgesamt 64 mol ministriert, drzue chunnt no s’Stärnsinge und mängi Rorategottesdienst. Dr Rorategottesdienst isch für mi immer öpis speziells gsi, will s’Wichtle eifach immer e tolli Sach gsi isch und das miniere Meinig noch au näbem Zweimal Weihnachten no Platz set ha, zumindist für d’Chinge. Die Joore woni ministriert ha si einigi luschtigi Moment vergange. Wenn 3-4 Minis do vorne sitze und sich kaputtlache wäge irgendöpis und dr Pfarrer fascht e Krise überchunnt, emol öpis ganz verchert lauft oder dr Fabian und ig, als zwe Neuling damals, elei mitem Pfarrer, inere vollbsetzte Chilche, e Gottesdienst g’meischteret hei, will 3 eifach nid choh si, si das Sache woni mi gern dra erinnere. Vo all dene Wiehnachtsfiire, Wurschtbrötle und Usflüg i Europapark, isch s’gröschte Highlight d’Hamburgreis mit dr grosse Schiffsparade gsi wo mi fescht imponiert het. Die Moment, hei mir zeigt, das ministriere nid nur «still ufem Stieli sitze» heisst. Bsungers gfreut het mi natürlich au, wenn d’Lüt oder dr Pfarrer nach dr Chilche zu mir cho si und globt hei wini das guet gmacht heig. Aber au ministriere inere meischt guet bsetzte Chilche ghört nid zur Selbstverständlichkeit. Aber hüt isch dr Tag cho, wos für mi Ziit isch zum Adieu säge, zumindischt was s’Ministriere ahgot. Dass dr Fabio, dr Chlinst i dr Familie au gseit het, er welli mässdiene het mi das notürlich gfreut. Aber mini Ziit as Ministrant got hüt z’Änd und i mach Platz für die 12 Neue wo hüt ufgno wärde. I däm Sinn, ä ganz grosses Dankschön a Pfarrer Franz Sabo und a Alli wo mir 6 Joor lang as Ministrant e schöni Ziit beschert hei.
Merci vielmol!!!
Nico Karrer
